Zabaleta-Berri eta Zatarain auzoetako gune publikoak estaltzeko bi bilera egin ditu berriki udalak, batean zein bestean bizi diren auzotarrekin. Parte hartu dutenen "inplikazioa" eskertu dute Agustin Valdivia alkateak eta Herritarren Partaidetza saileko zinegotzi Nagore Duranek. Ekarpen gehiago egin nahi dituztenek hilaren 28ra arteko epea izango dute, 14:00ak arte, udalaren webguneko formulario bat bete eta arduradunei bidalita.

ATLO elkarteak antolatzen duen gaztetxoen danborradan parte hartu nahi dutenek inskribatu egin beharko dute eragile horrek kultur etxean duen lokalean, hilaren 28an edo 29an, 17:00etatik 18:30era. 2008 eta 2018 bitartean jaio direnek danbor edo kupel jotzaile edota kantinera izan ahalko dute; 2019an eta 2020an jaio direnek, berriz, kantinera edo gastadore.