Lasarte-Oriako taberna ezagunenetako bat kudeatu duten Edorta Aldazabal eta Lorena Saenz agurtu dituzte lagun eta gaur egungo nahiz lehengo lankide artean. Zubietako elkartean bapo bazkaldu eta Ilargira bertara itzuli dira arratsaldean, luzaroan gogoratuko duten parranda botatzera. Itxi dute bizitzako etapa garrantzitsu bat, beste bati ekiteko. 

Eguberriak ailegatzeko egun gutxi falta dira; bi aste eskas, hain zuzen ere. Festetako giroa sortzearren, hainbat ekitaldi prestatzen dira, herrian. Ekintza horien artean, Aterpea Elkartea ekimen askoren antolatzailea izango da. Izan ere, hasteko, txu-txu trena atera du Lasarte-Oriako txokoak garraiobide berezi horrekin ezagutzeko. Larunbatean izan dute aukera herritarrek bertan bidaiatzeko; goizeko txandan, hots, 10:00etatik 14:00etarako tartean edota arratsaldekoan, 17:00etatik 20:00etara luzatutakoan. Haurrez zein helduez osatutako ilara izan da uneoro Jalgi parean. Hurrengo astean, elkarteak berak gaztain jana ospatuko du, Okendo plazan.