Lilura liburudendan elkartu dira Agustin Valdivia alkatea, Manuel Lekuona Kultur Etxeko kudeatzaile Mikel Muñoz eta saltoki horren jabe Oihana Izpura, 2024-2025 kurtsorako materiala erosteko dirulaguntza deialdiaren xehetasunak esplikatzeko. Urtean 40.001 euro baino gutxiagoko sarrerak dituzten familiek izango dute eskatzeko aukera: 25.000 euro baino gutxiago irabazten dituztenek 110 euro jasoko dituzte; 25.001 eta 33.000 euro artean dabiltzanek, 80; eta, azkenik, 33.001 eta 40.000 euro artean ingresatzen dituztenek, 50. Koaderno, estutxe, arkatz eta bestelakoak udalerriko dendetan erosi beharko dituzte irailaren 30a baino lehen. Eskaerak, berriz, irailaren 2tik 30era bitartean egin beharko dituzte. Eskatzaileek eta ikasleek Lasarte-Orian erroldatuta egon beharko dute, aurtengo urtarril hasieratik gutxienez.

Landaberrin nahiz Sasoetan ikasten ari diren Lehen Hezkuntzako 4. eta 6. maila arteko ikasleek ingurumenari buruz landu dutena partekatu dute udal gobernuko zenbait ordezkarirekin, udalbatzar aretoan. Aurtengo ikasturtean pil-pilean dauden hiru alor jorratu dituzte gaztetxoek, ikasmaila bakoitzeko kideek bana: landaredia, energia eta hondakinak