Ez da giro munduan, erroko aldaketak ari baitira gertatzen ludiaren luze-zabalean. Halakoetan, babesa etxeko intimotasunean bilatzea izan daiteke instintuzko joera. Giza-zentzuaren bila, jatorrena etxeko esperientziaren magalera itzultzea delako. Egiatan, inor ez da noraezean ari den unibertso global horretan bizi. Gizaki gehienok, etxearen inguruan egiten dugu bizitza ia osoa. Etxekoa eta etxe-ondokoa da gure bizipen nagusia. Baina, ezin dugu bizi mundu globalean gertatzen ari direnei bizkar emanda, ikusita jazoera horiek nola eragiten dioten gure bizimoduari. Aspalditik, gaurko egunean gehiago, etxea ez da itxia. Gogoratu dezagun, Gernikako haritza zela medio, Iparragirre bardoak kantatzen zuena. Gure izanbidea urratzeari eusteko, bertan ekoitzitako fruitua mundu osoan zabaltzeko gauza izan behar dugu eta.