Datorren ikasturterako eskolako materiala erosteko dirulaguntza eska dezakete herritarrek

Txintxarri Aldizkaria 2024ko uztailaren 11

Lilura liburudendan elkartu dira Agustin Valdivia alkatea, Manuel Lekuona Kultur Etxeko kudeatzaile Mikel Muñoz eta saltoki horren jabe Oihana Izpura, 2024-2025 kurtsorako materiala erosteko dirulaguntza deialdiaren xehetasunak esplikatzeko. Urtean 40.001 euro baino gutxiagoko sarrerak dituzten familiek izango dute eskatzeko aukera: 25.000 euro baino gutxiago irabazten dituztenek 110 euro jasoko dituzte; 25.001 eta 33.000 euro artean dabiltzanek, 80; eta, azkenik, 33.001 eta 40.000 euro artean ingresatzen dituztenek, 50. Koaderno, estutxe, arkatz eta bestelakoak udalerriko dendetan erosi beharko dituzte irailaren 30a baino lehen. Eskaerak, berriz, irailaren 2tik 30era bitartean egin beharko dituzte. Eskatzaileek eta ikasleek Lasarte-Orian erroldatuta egon beharko dute, aurtengo urtarril hasieratik gutxienez.

Dirua jaso ahal izateko erosketa tiket eta fakturak aurkeztu beharko dituzte herritarrek eskaera orriarekin batera. Tramitea sarean egiten badute, aipatutako agiri horiek eskaneatu eta elektronikoki sinatu beharko dituzte.

Aipatu egitasmo horren helburuak dira eskolan ikasten duten haurren familiei laguntzea eta eskolako materiala herriko establezimenduetan erostea sustatzea.

Honako erosketa hauek lagunduko ditu diruz udalak: idazmahairako materiala, eskolarako arropa, edo optometriarako, kirolerako nahiz jarduera artistikoetarako tresnak. Horrez guztiaz gain, berrikuntza gisa, informatikarekin zerikusia duten objektuak ere sartu ditu deialdian erakundeak.

Hezkuntza