Lasarte-Oriako egun sargoritsuak euriteen eta ekaitzen aurrekari izan ohi dira zenbaitetan eta gaurkoa ez da salbuespena izango, Euskalmet metereologia agentziak aurreikusitakoaren arabera: abisu horia ezarri du 18:00etatik 00:00etara arte. Zaparrada "ertain eta trumoitsuak" egin ditzake eta, horren ondorioz, metro karratuko hamabost litro baino gehiago pilatu. Horrez gain, bi eta lau zentimetro arteko lodierako txingorra eta 60-100 kilometro orduko abiadurako haize boladak izan daitezke.

"Blokeo inperialistaren aurrean", Kubari elkartasuna adierazteko ekimena aurrera eramango duela iragarri du Buruntzaldeko Kontseilu Sozialistak: eskualdeko bost udalerritan, Lasarte-Orian barne, elikagaiak eta bestelako produktuak jasoko dituzte Okendo plazan, 11:00etatik 14:00etara. Hauxe da jasoko dutena: osasun, higiene, garbitasun, kirol edota eskolarako materiala, elikadura osagarriak edota elikagai ez galkorrak.