Hankaz gora dago mundua eta edonon gertatzen ari dena ulertu ahal izateko beharrezkoa da ongi informatzea, ikuspuntu kritikoa garatzeko baliabideak eskuratzea eta norberaren iritzia argi azaltzeko gai izatea. Hori guztia (eta gehiago) lantzen ari dira Oriarte Larrekoetxe institutuan ikasten duten 1. Batxilergoko hamalau ikasle, Nora Muñoa Guenaga irakaslearekin batera, Munduko Gatazkak izeneko irakasgaian. Gaur egun pil-pilean dauden gatazka ugari landu dituzte eta horiek testuinguruan jartzeko atzera ere begiratu dute asteartetan eta ostiraletan egiten dituzten saioetan. Teoria barneratuta, praktikara eraman dute ikasitakoa eta hamalau iritzi artikulu prestatu dituzte, zazpi astetan TXINTXARRI aldizkariaren paperezko orrietan zein txintxarri.eus webgunean argitaratuko ditugunak. Ikasturte hasieran gurekin jarri ziren harremanetan lankidetza egitasmo bati ekitea posible zen ala ez aztertzeko, eta, datozen asteetan ikusiko (eta irakurriko) duzuenez, pozarren ekin diogu proiektuari guztion artean.