Baltasar Garzon epaileak ireki zuen 35/02 sumarioa 2002. urtean, Herriko tabernen auzia izenez ezagutzen dena. Xirimiri elkartea ixteko agindua eman zuen urte horretako maiatzean, eta kontuak blokeatzeko agindu. Gerora, Xirimirik ateak ireki zituen berriro, eta abokatuak helegitea jarri zion kontuak blokeatzeko erabakiari 2013-2014 ikasturtean, baina Auzitegi Nazionalak ez zuen aintzat hartu.
Orain egikaritu du Auzitegi Nazionalak blokeo hori, eta Xirimiriren izenean dauden bi kontu horiek enbargatu, duela hemezortzi urteko diru kopuruarekin. Elkarteko zuzendaritza batzordeak adierazi du bide desberdinak bilatzen ari dela bazkideekin bilera informatibo bat egiteko.
Argazkiak bidaltzeko deia
Xirimirik ondoko dinamika hau martxan jarriko du sareetan: eskatuko die herritarrei biltzeko elkarteari buruzko argazkiak, berriak eta zaharrak, kentzeko hautsa azken horiei eta e-mail bidez bidaltzeko, maiatzaren 3a baino lehen, helbide honetara: xirimirielkartea@gmail.com.
"Urteotan asko eta asko gara elkartetik igaro garenak. Hainbat otordu, festa, hitzaldi eta jardunaldi antolatu ditugu. Izan ere, Xirimiri elkarte gastronomikoa baino askoz gehiago izan da guretzako. Bilgune kulturala, politikoa eta lagunartekoa izan da, eta hori guztia jasotzea gustatuko litzaiguke orain", nabarmendu du batzordeak. "Garai ilunotan, eman diezaiogun Xirimiriri merezi duen kolorea!".
