Kantxa barruko egurrezko teilatutxoa berritzen ari dira langileak, udalak jakinarazi duenez. Lan horiek bi aste irautea aurreikusi dute eta jakinarazi dute hau dela helburua: "Instalazioaren egoera hobetzea eta erabiltzaileei kalitatezko kirol gunea eskaintzen jarraitzea". 

Junior Partaidetza kategorian ari den Ostadar SKTren taldeak ezin hobeto eguneratu zuen lehia: zegokion jardunaldiko nahiz atzeratutako bateko partidak irabazi zituen, larunbatean bat eta igandean bestea (urriak 31 eta hilak 1). Aurreneko neurketan Plastigaur hartu zuten Maialen Chorraut kiroldegian eta aise irabazi zuten, 72-31. Garaipen horrek emandako indarrak baliatuta, hurrengo egunean 71-50 gailendu ziren Aloña Mendiren aurka. Horiek horrela, orain arte jokatutako lau norgehiagokak poltsikoratu dituzte urdin-beltzek.