Mankomunitatekoek uste dute garapen plana "tresna oso baliotsua" izango dela "langileen, prestakuntzaren, digitalizazioaren, belaunaldien arteko erreleboaren edo talentua erakartzearen arloan enpresek dituzten beharrak antzemateko". Halaber, "eskuragarri dauden baliabide eta laguntza publikoak benetan behar diren lekura bideratzeko" lagungarri izango delakoan daude.
Era berean, gogorarazi dute eskualdeko Enplegu eta Tokiko Garapen Planaren baitan hartzen diren erabakiek eta martxan jartzen diren egitasmoek "eragin zuzena" izango dutela enpresengan. Horregatik, garrantzitsua iruditzen zaie eragile ekonomikoek proiektuan "hasiera-hasieratik" parte hartzea.