"Txantxetan ari garela irudituko zaizue agian, baina jada hasi gara 2026ko San Pedro Jaiak prestatzen". Agustin Valdivia alkatearen hitzak dira, aurtengo festak amaitu berritan Festak departamentuko zinegotzi Txus Alonsorekin batera egindako balantzean esandakoak. Ekain bukaerako bost egun horietan bizitako guztiaz osatuta, adin tarte guztietako lasarteoriatarrek gogotik gozatu dutela adierazi du alkateak, neurri handi batean, udalerriko gune desberdinetan ekimen ugari aurrera eraman dituztelako aldi berean. "Edozein larunbatetan" jazo zitezkeen liskar eta borrokak gertatu direla onartu badu ere, nabarmendu du eraso sexistarik ez dela gertatu: "Sanpedroez gozatzeko gogoa izan dute guztiek, betiere ingurukoak errespetatuta".