Lasarte-Oriako toki izenen garrantzia nabarmentzeko egitasmo bat prestatu dute Lasarte-Oriako Udalak eta TXINTXARRI aldizkariak, elkarlanean. Abendura bitartean gai horri buruzko edukiak argitaratu eta lehiaketak antolatuko dituzte.
Sariak jaso dituzte Irene Urruzolak eta Haizea Elvirak

Txintxarri Aldizkaria eka 14, 08:00 Euskara

Maiatzean zehar udalerriko toponimiari buruzko galdera lehiaketa bat aurrera eraman zuten Lasarte-Oriako Udalak eta TXINTXARRI aldizkariak, jakintza alor horren garrantzia ikusarazteko egiten ari diren elkarlan egitasmoaren barruan. Hiru astetan zehar gauzatu zuten, horietako bakoitzean toki izenei buruzko hamar galdera eginda jokalariei. Den-denak asmatu zituztenen artean egindako zozketan, Irene Urruzolari egokitu zaio Nekatur Nekazal Turismo Elkartearen zerrendan daudenetako nekazal etxe batean gaua igaro eta gosaltzea. Bestalde, parte hartzaile guztiei egindako ahalegina eskertzeko, Avenida taberna-jatetxeko bi menu ere zozkatu zituzten antolatzaileek eta Haizea Elvirak irabazi ditu. Banaketa ekitaldia Okendo plazan egin zuten eta sustatzaileen izenean udaleko Euskara saileko zinegotzi Jon Antxordokik eta TXINTXARRI-ko arduradun Iñigo Gonzalezek eman zizkieten sariak aipatu bi herritarrei.