Inaxio Urruzola Bitoria herritarrak (Lasarte, 1943) lekukotza eder bat eman du euskarari eta batez ere aroztegian lan egitetik jubilatu zenean hartu zuen irakurzaletasunari buruz. Bere garaian ikasketa gutxi jaso zituen eta hizkuntzaz "pixka bat gehiago jabetzea" du xede, hitz egitearen ondorioz menperatzen baitu berak baina ez bere seme-alabek bezain "era akademikoan". TXINTXARRI eratu zutenean, 1993an, gustura hartu eta euskararekiko gehiago zaletu zela ere adierazi du: "Bete egiten nau". Erretiratu zenetik idazki mordo bat irakurri ditu Inaxiok, egunero-egunero du horretarako ohitura. Denbora pasatzeko modu atsegin bat da berarentzat.