Lasarte-Oriaren ikurretako bat den krosaren atzean dagoen lan guztiaren lagin bat erakustea da artikulu honen asmoa: partaideen izen emateak jaso eta kudeatu, lasterketa egunean lan informatikoa egin (sailkapenak eta informazioaren kudeaketa, duela zenbait urtera arte zapatiletan jartzen ziren txipen bidez egiten zena), fruta moztu eta poltsak prestatu, ibilbidea diseinatu eta antolatu, irteera lerroan txistua jo nahiz dantzatu, krosa aurkeztu, ibilbidea zaindu, Orian parte hartzaileei ura eman, helmugaratzea zaindu, sariak banatu, Korrika Festako gaztetxoak gidatu eta korrika egiteaz bukatzen dutenean elikagaiak eman... eta abar luze bat. Aurten ere zeregin horiek guztiak aurrera eramango dituzte makina bat pertsonak, eta, kirol proba jokatu ez arren, izerdi ederrak bota ere bai. Bejondeizuela denoi!
Boluntarioak, Lasarte-Oria Bai! krosaren esku, birika eta bihotzak
Lasarte-Oria Bai! krosaren antolatzaileak, Ostadar SKTk, ekitaldi herrikoi hori urtero-urtero aurrera eramaten laguntzen duten boluntarioak omenduko ditu aurten, 1 dortsal "sinbolikoa" orain arteko 26 aldietako batean edo batzuetan (edota guztietan) lagundu dutenei eskerrak emateko. Kirol elkarte horretako kideen hitzetan, "150 bat lagun" izaten dira urtero lasterketaren esku, birika eta bihotzak. Argazki artxiboan arakatu du TXINTXARRI-k eta urte ugaritako irudiak ekarri artikulu honetara.
