Amaiezina ez, ezinezkoa delako, baina ahaztezina bai, horrelakoa izan da sanpedroetako larunbat gaua, parranda luzeena. Herritarrek hamaika jarduera izan dituzte aukeran eta denetan disfrutatu dute: ATLO elkartearen beteranoen danborrada, Kaotiko eta Urtz taldeak Okendon, Tsunamiren emanaldia Isla plazan, Bombay-ren kontzertua Jaizkibel plazan eta musika etenik gabe Oriarteko gazte esparruan, DJ Nemux-en eskutik. Horrez gain, gasolina deposito amaiezina duela dirudien Arranopola txarangak girotu ditu kaleak.
