Lasarte-Oriak mozorroa jantzi du, baina ez du aterkia ahaztu

Ohi bezala, konpartsek euren emanaldiak eskaini dituzte, Okendo plazan, larunbat goizean. Biyak Bat, Jalgune, Intzak Parranda, Sasoeta Sasoian eta La Tribu izan dira aurtengo Inauterietako parte hartzaileak. Dena den, berrikuntzarik izan da. Izan ere, Amaia Gonzalez Caballero eskolako dantzariek hasi dute ikuskizuna. Gogotik gozatu dute dantza saioak egiten, eta jarraian, bakarkako nahiz taldekako mozorro lehiaketetako hautagaiak aurkeztu dituzte. Bestalde, euria goitik behera aritu arren, lasarteoriatarrak mozorrotu eta kalera irten dira; euritakoarekin, noski. Giroa alaitzeko asmoz, Oaintxe in deu! txarangak zenbait doinu jo ditu, erdigunean zehar.