Lasarte-Oriako Euskaraldiaren Koordinazio Guneko partaideek gogorarazi dute gaurkoa izango dela ariketa sozial horren bueltako ikus-entzunezko txapelketan parte hartzeko azken eguna. Bideoek minutu bat iraun dezakete gehienez eta 'Merezi du Euskaraldian parte hartzea' leloa izan behar dute. Hiru modalitatetan aritu daitezke herritarrak: banaka edo binaka, taldeka edo kuadrillan eta familian. "Sari bikainak" emango dituzte maiatz erdialdean.
Kategoria bakoitzeko bideo bozkatuenaren saria irabazten duenak 500 euro poltsikoratuko ditu. Epaimahaiaren sariak irabaziz gero, berriz, 1.000 euro.
Herritar ugari animatu dira parte hartzera eta 23 bideo bidali dituzte orain arte. Hemen ikus ditzakezue horiek guztiak.