"Erronka itxaropentsua". Lasarte-Oriako Euskaraldiaren Koordinazio Guneko kideek horrela definitu dute maiatzaren 15etik 25era Euskal Herri osoan aurrera eramango duten ariketa soziala, euskararen erabilera bultzatu eta herritarren hizkuntza ohiturak astintzekoa. Bi termino horien batura agerraldian bertan egin dute, Ahobizi gisa izena eman duten Danel Apaolaza eta Aitor Smart gazteen testigantzak baliatuta. Euskaraldia beraientzat zer den hitz bakar batean zehazteko eskatuta, "itxaropena" esan du aurrenekoak, eta "erronka" bigarrenak.
Horrelakoetan, esperantza bezain garrantzitsua da jarduteko grina izatea, eta, horri begira, maiatz erdialdera iritsi arteko asteak berotzen eta dinamizatzen jarraitzen du koordinazio guneak. Udalaren izenean Euskara zinegotzi Estitxu Alkortak hitz egin du, azaltzeko dagoeneko herriz herri dabilen gune ibiltaria izango dela programako hurrengo ekimena. Hilaren 12an ekarriko dute Okendo plazara, 18:00etatik 21:00etara. "Euskaraldia gizarteratzeko eta pedagogia lanerako bitarteko ikusgarria da", nabarmendu du. Horren bidez honakoak lortu nahi dituzte antolatzaileek: Ahobizi eta Belarriprest rolen berri ematea, ariketa nola egin daitekeen aurrez aurre azaldu eta datak gogoratuta; izen ematea indartzea eta sustatzea; materiala herritarrek ikusi eta probatzeko aukera izatea; Euskaraldiko abestiarekin familiarizatzea; eta kalean presentzia irabazita parte hartzea aktibatzea.
Magia ikuskizuna ere bai
Gune ibiltariak udalerrian igaroko dituen hiru orduak gozagarriak izatea ere nahi dutenez, Asier Kidam mago gasteiztarra gonbidatuko dute antolatzaileek. Ttakun Kultur Elkarteko kide Arkaitz Illarramendik azaldu duenez, "eskarmentu handiko artista" da, 19 urte zituenean lortu baitzuen pasioa lanbide bilakatzea. "Hurbileko magia egiten du".
Euskaraz egitea, besteak beste, magikoa ere badenez, koordinazio guneko kideek dagoeneko Euskaraldian izena eman duten bi gazte gonbidatu dituzte agerraldira, Danel Apaolaza eta Aitor Smart. Illarramendik egin ditu elkarrizketatzaile lanak eta galdetu die ea zergatik animatu diren hizkuntza ohiturak astintzeko ariketa horretan parte hartzera. "Euskara beharbada ez da horren ospetsua eta erabilera galtzen ari da, horri buelta emateko Euskaraldia ariketa polita dela uste dut, Ahobizi edo Belarriprest izanda", hausnartu du Smartek. Labur baina argi erantzun du Apaolazak ere: "Euskara sustatzeko eta hitz egiteko".
Oraindik izena eman ez duten herritarrak ekimenarekin bat egitera animatu dituzte bi gazteek. "Euskaraz hitz egitea polita da eta hizkuntza hori egunerokoan erabiltzea gakoa da". Horren harira, Alkortak azpimarratu du Ahobiziak bezain garrantzitsuak direla Belarriprestak (euskara dakitenei adieraziko diete, erantzuteko gaitasuna agian ez izanda ere, beraiekin euskaraz mintza daitezkeela), are gehiago Lasarte-Orian, bertako egoera soziolinguistikoa zein den kontuan izanda.
Euskaraldian izena emateaz gain badaude jarduera horretan parte hartzeko modu gehiago, Euskara zinegotziak gogoratu duenez. "Martxan dugu bideo lehiaketa, hilaren 28ra arte. Banaka edo binaka, familian edota taldean parte har dezakezue guztiok; anima zaitezte, sari bikainak emango ditugu-eta!".
