Askatasuna parkeko etxebizitzen arkupean babes hartu dute sorgin azokako partaideek beraien mahaiak eta produktuak kokatzeko. Kuxkuxean, galdezka, erosketan... zenbait herritar bertaratu dira eskaintzaren berri izateko. Arratsaldera arte bertan izango dira pitxiak, loreak, poltsak, apaingarriak edota karikaturak saltzen, halakoak erosita sortzaileak babestu nahi dituztenen zain.
Aterpean aurrera eraman dute ere Bizipozaren akelarrea Porrotxek eta Marimototsek. Dozenaka haur eta gurasorekin batera, dantzan eta kantuan aritu dira. Nahi zutenek eskulanak egin edo margotzeko aukera zuten alboko mahaietan eta jaia amaitzean, Askatasuna parkeko haritzetan landatu dituzte margotutako ametsak.
Gehienek, hala ere, pailazoekin jolasean aritzea nahiago izan dute. Une batean aurtengo Sorgin Jaiaken omendua batu zaie eta haiekin batera aritu dira. Oaintxe In Deu txarangak musika jarri du, Xumelak ahotsa, eta gainerakoek, bizipoza.
