Ttakun Kultur Elkarteko Gaztekluba eta Kuadrillategi egitasmoek antolatutako mozorro festetan parte hartzeko aukera izan dute ostiral arratsaldean herriko gaztetxoek. Lehenik, 9-12 urte bitartekoen txanda izan da. Erakustaldiak egin ondoren, sariak eta askaria banatu dizkiete eta photocallean argazkiak egin dituzte taldeka. Indarberrituta, askok ondoren hasi den 12-16 urte bitartekoentzat prestatutako inauteri festa jarraitu dute. Karpa jendez bete da dantzarako abilezia erakutsi dutenak ikusteko. Nabari zen nork serio hartu, eta prestatu duen beren pieza; eta nork ondo pasa besterik ez zuen nahi. Denak amaituta, hiru sari banatu dituzte epaileek: originaltasunari, mozorroari eta ikuskizun onenari. King Africa, Mimoek eta Ilargia abestu zuen taldeak jaso dute bana.