Agustin Valdivia alkateak jaurti du etxafuegoa. San Pedro parrokiako kanpaiak eguerdiko hamabiak noiz emango itxaron du, baina jotzen ez zuela ikusita, suziria piztea erabaki du. Txapligua lehertu denean (suziria, etxafuegoa, kohetea, askotan erabiliko dugun hitza denez sinonimo berriak ikasi ditugu guk ere) dantzan eta kantuan hasi dira herritarrak, eta udaletxeko balkoitik jaurti dituzten pilota koloredunak astintzen. Bien bitartean, konfetiak eta paraxut txiki batzuetan jausi diren globoek koloreztatu dute Kale Nagusia.
Arratsaldeko txupina 19:00etan botako dute, udaletxe berriko balkoitik. Pregoia aurtengo omenduak egingo du, Nagusilan elkarteak.
