Helburua orain arteko 11 edizioetako oroitzapenak berreskuratzea, belaunaldiak elkartzea eta Lasarte-Oriako euskararen historiaren zati bat berriz bizitzea da. Horretarako, 11 galdera prestatu ditugu, maratoiaren edizio bakoitzari buruzko bana. Garai bateko leloak, protagonistak, ikurrak eta une bereziak gogoratzeko aukera izango dute parte hartzaileek.
Patxadaz erantzun
Ez dago presarik erantzuteko! TXINTXARRI-ren Maratoiteka atalean eta Euskararen Maratoiaren YouTube-ko kanalean dauden bideo historikoetan aurki ditzakezue erantzunak. Beraz, ikertu, iraganeko irudiak ikusi eta erantzun guztiak ondo pentsatzera gonbidatzen zaituztegu. Bi sari banatuko ditugu: batetik, 11 galderak zuzen erantzuten dituzuenon artean Euskal Herriko landetxe batean egonaldia zozkatuko dugu, bi gauekoa, bi pertsonarentzat (gosari eta afari bana barne); eta bestetik, azaroaren 8ra arte parte hartzen duzuen guztion artean sari berbera emango dugu, lehenaren irabazlea kanpo utzita.
Ekimen hori LABORAL Kutxaren babesari esker gauzatuko da. TXINTXARRI-k eskerrak ematen dizkio euskararen, herritarren parte hartzearen eta tokiko komunitatearen aldeko proiektu horrekin bat egiteagatik.
Hortaz, Euskararen Maratoiaren historia berriz bizitzeko eta sari ederra eskuratzeko aukera duzue. Prest al zaudete 40 urteko historia 11 galderatan laburbiltzeko?
11 galderak
| 1986 | Zein izan zen aurreneko edizioaren leloa? |
| 1988 | Zein datatan ospatu zen bigarren aldia? |
| 1992 | Nor ez zen izan III. edizioko zortzikoteko kide? |
| 1996 | Zenbat urte zituen garai hartan (IV. maratoian) zortzikoteko kide Agus Mujikak? |
| 2000 | Nork moztu zuen V. edizioko hasierako zinta? |
| 2004 | Zein abeslari famaturen abestia oholtzaratu zuen zortzikoteko kide David Egizabalek? |
| 2008 | Zein izan zen 2008. urteko ikur nagusia? |
| 2012 | Zein mendiren izena berreskuratu zen eta buzoia jarri zen bertan, VIII. edizioan? |
| 2016 | Zein izan zen 2016ko maratoian aurrera eraman zen ariketa linguistikoaren ikurra? |
| 2022 | Hiru fase izan genituen 2022an. Zeintzuk? |
| 2026 | Zortzikoteko kideetatik, nortzuk izan dira berriak aurten? |