Ohetik altxa eta kalera atera ziren herritarrak duela bi urte, goizean goiz heldu baitzen 22. Korrika gure herrira. Aurten, alderantzizkoa izango da bidea: euskararen aldeko lasterketa erraldoi horretan parte hartu eta lotara sartu gero. Izan ere, egitasmo horren 23. aldia martxoaren 19an (asteartea) ailegatuko da Lasarte-Oriara, Urnietatik, 21:58an. Ia ordubetez zeharkatuko ditu kale eta bazterrak, Hipodromo etorbideko zubian barrena Usurbilerantz abiatu aurretik.
Erreferentziazko guneak
Martxoaren 19an helduko da 23. Korrika gure herrira, asteartearekin, 21:58an, Urnietatik. Ia ordubetez zeharkatuko ditu kale eta bazterrak, Hipodromo etorbidean barrena Usurbila abiatu aurretik 22:50ean. Hauek dira gau berezi horretan herritarrek kontuan izan beharreko erreferentziazko guneak:
• 21:58 Kostegi (Oztaran bidea, 3).
• 22:02 Urnieta bidea, 17.
• 22:05 Urnieta bidea, 3.
• 22:08 Goikale, 19.
• 22:12 Ola kalea, 2.
• 22:15 Kale Nagusia, 56.
• 22:19 Kale Nagusia, 79.
• 22:22 Kale Nagusia, 34.
• 22:26 Donostia etorbidea, 6.
• 22:29 Bariante errepidea (Goiegi jatetxea zenaren parean).
• 22:33 Pinutegi, 10.
• 22:36 Hernani bidea, 10.
• 22:39 Osina kalea, 3.
• 22:43 Buenos Aires aldapa, 4.
• 22:46 Buruntza kalea, 9.
• 22:50 Pintore eta Iñigo de Loiola kaleak gurutzatzen diren izkina.
Martxoaren 14tik 24ra
Bost egun lehenago abiatuko da 23. Korrika, Irundik, eta Euskal Herri osoa zeharkatuko du 24ra bitartean, Baionan amaituta. Harro herri izango da aurtengo aldiaren leloa, arrazoi honengatik, lasterketaren aurkezpenean Korrikaren arduradun Ane Elordik eta AEKren Artekaritza Kontseiluko lehendakari Aitziber Balantzategik adierazi zutenez: "Aurreko edizioko parte hartze masiboak argi utzi zuen gure hizkuntzaz harro gaudela eta guztion artean komunitate sendoa osatzen dugula".
