LGTBIQ+ kolektiboa osatzen duten pertsonen borroka ikustarazteko xedez sortu zuten iaz Lasarte-Oriako Transmaribollo Kolektiboa, eta lehenengoz manifestazioa egin zuten Lasarte-Orian ekainaren 28an, "LGBTIQ+ harrotasuna" gisa ezagutzen den egunean.
Gogoratu dutenez, "Hemen gaude leloarekin agertu ginen iaz. Hemen gaudela bollerak, hemen gaudela marikak, biak, transak, querrak... heteroarauaren disidentzia guztiak". Horiek denak bistaratzeaz gain, euren jarrera ere azaldu zuten; alegia, egoteaz gain, nola dauden: "Zisheteropatriarkatuari, heteroarauari, transmaribollofobiari, patologizazioari eta askotariko biolentziei 'nahikoa da' esanez, 'hemen gauzkazue eta eman aurrean izango gaituzue".
Nabarmendu dutenez, ez dute aldaketarako arrazoirik, are gehiago salatu egin dute gorroto diskurtsoen eta eraso homofoboen indartzea. Erasotzaileei eta "horiek isiltasunez babesten dituzten" konplizeei berriro ohartarazi diete ez direla ez isilduko, ez kikilduko ezta eztutatuko ere.