Osasun agintariak datuak herriz herri xehatuta ematen hasi zirenetik, koronabirusak kutsatutako 2.148 lasarteoriatar atzeman dituzte, ehun biztanletik 11 pasatxo (%11,3). Gehien-gehienak sendatu badira ere, zoritxarrez, 24k ezin izan dute osatu eta hil egin dira. Iazko martxotik orain artekoan, azaroa izan da kutsatu gehien zenbatu dituzten hilabetea, zehazki, 275.
Beterri-Buruntza eskualdeko udalerrietan hiru kasu zenbatu dituzte asteartean: bana Hernanin, Lasarte-Orian eta Urnietan. Sei herritatik hiru gune berdean daude, eta horian beste hiruak.
Euskal Autonomia Erkidegoko hiru lurraldeetan 89 positibo diagnostikatu dituzte egun horretan; horietatik 32, Gipuzkoan. 7.313 proba egin dituzte Osakidetzako langileek kutsatze berriak hautemateko, eta %1,3k eman dute positibo. Osakidetzako ospitaleetan 126 pertsona daude ingresatuta koronabirusagatik, horietatik 39 larri, Zaintza Intentsiboetako Unitateetan. Asteartean 22 eri ingresatu behar izan dituzte, gaixotasunaren sintomek okerrera eginda.
