Osasun agintariak datuak herriz herri xehatuta ematen hasi zirenetik, koronabirusak kutsatutako 2.141 lasarteoriatar atzeman dituzte, ehun biztanletik 11 pasatxo (%11,2). Gehien-gehienak sendatu badira ere, zoritxarrez, 24k ezin izan dute osatu eta hil egin dira. Iazko martxotik orain artekoan, azaroa izan da kutsatu gehien zenbatu dituzten hilabetea, zehazki, 275.
Beterri-Buruntza eskualdean bost kasu diagnostikatu dituzte asteartean: bi Hernanin eta bana Astigarragan, Lasarte-Orian eta Usurbilen. Koronabirusaren intzidentziak jaisten segitzen du, eta Hernani eremu berdera igaro da.
EAEko hiru lurralde historikoetan 130 positibo detektatu dituzte hilaren 21ean; horietatik 40, Gipuzkoan. 6.815 proba egin dituzte kutsatze berriak hautemateko, eta ehunetik ia bik (%1,9) eman dute positibo. Osakidetzako ospitaleetan 159 pertsona daude ingresatuta koronabirusagatik; larri daude horietatik 49, Zaintza Intentsiboetako Unitateetan. Asteartean 26 paziente erietxeratu behar izan dituzte, gaixotasunaren sintomek okerrera eginda.
