Osasun agintariak datuak herriz herri xehatuta ematen hasi zirenetik, koronabirusak kutsatutako 2.140 lasarteoriatar atzeman dituzte, ehun biztanletik 11 pasatxo (%11,2). Gehien-gehienak sendatu badira ere, zoritxarrez, 24k ezin izan dute osatu eta hil egin dira. Iazko martxotik orain artekoan, azaroa izan da kutsatu gehien zenbatu dituzten hilabetea, zehazki, 275.
Beterri-Buruntza eskualdean apenas atzeman duten kasu berririk asteko lehen egunean: bi besterik ez, Lasarte-Orian. Eskualdeko sei udalerriak eremu horian daude.
EAEko hiru lurraldeetan 119 positibo diagnostikatu dituzte hilaren 20an; horietatik 45, Gipuzkoan. 6.723 proba egin dira kutsatze berriak hautemateko, eta ehunetik ia bik eman dute positibo (%1,8). Osakidetzako ospitaleetan 164 pertsona daude ingresatuta koronabirusagatik; horietatik 50 larri daude, Zaintza Intentsiboetako Unitateetan (ZIU). Astelehenean hamasei paziente erietxeratu behar izan dituzte, gaixotasunaren sintomek okerrera eginda.
