Osasun agintariak datuak herriz herri xehatuta ematen hasi zirenetik, koronabirusak kutsatutako 2.120 lasarteoriatar atzeman dituzte, ehun biztanletik 11 pasatxo (%11,1). Gehien-gehienak sendatu badira ere, zoritxarrez, 24k ezin izan dute osatu eta hil egin dira. Iazko martxotik orain artekoan, azaroa izan da kutsatu gehien zenbatu dituzten hilabetea, zehazki, 275.
Beterri-Buruntza eskualdean zazpi kasu baieztatu dituzte asteazkenean: hiruna Lasarte-Orian eta Urnietan, eta bat Astigarragan. Udalerri guztiak eremu horian daude, Urnieta izan ezik.
EAEko hiru lurraldeetan 234 positibo erregistratu dituzte irailaren 8an; horietatik 83, Gipuzkoan. 5.646 PCR eta antigenoen proba egin dira kutsatze berriak hautemateko; positiboak izan dira ehunetik lau pasatxo (%4,1).
Osakidetzako ospitaleetan 250 pertsona daude ingresatuta koronabirusagatik; horietatik 57 larri daude, ZIU unitateetan. Asteazkenean 41 paziente erietxeratu behar izan dituzte, SARS-CoV-2 birusaren sintomek okerrera eginda.
