Osasun agintariak datuak herriz herri xehatuta ematen hasi zirenetik, koronabirusak kutsatutako 2.093 lasarteoriatar atzeman dituzte, ehun biztanletik 11. Gehien-gehienak sendatu badira ere, zoritxarrez, 24k ezin izan dute osatu eta hil egin dira. Iazko martxotik orain artekoan, azaroa izan da kutsatu gehien zenbatu dituzten hilabetea, zehazki, 275.
Beterri-Buruntza eskualdeko udalerrietan zortzi positibo erregistratu dituzte abuztuko azken aurreko egunean: horietatik bost, Lasarte-Orian, eta beste hiruak, aldiz, Hernanin. Gaur-gaurkoz, Usurbil da eremu gorrian dagoen herri bakarra.
Gipuzkoan 105 kutsatze
EAEko hiru lurraldeetan 349 kasu detektatu dituzte azken 24 orduetan; horietatik 105, Gipuzkoan. 6.570 PCR eta antigenoen proba egin dira; %5,3 izan dira positiboak. Autonomia erkidego horretako intzidentzia-tasa 327,18 da, bezperan baino hamahiru puntu apalagoa.
Osakidetzako ospitaleetan 268 paziente daude koronabirusak jota; horietatik 72k sintoma larriak dituzte, eta ZIU unitateetan daude. Astelehenean 31 paziente ingresatu dituzte.
