Osasun agintariak datuak herriz herri xehatuta ematen hasi zirenetik, koronabirusak kutsatutako 1.820 lasarteoriatar atzeman dituzte, ehun biztanletik bederatzi pasatxo (%9,5). Ia denak sendatu badira ere, zoritxarrez, 23k ezin izan dute osatu eta hil egin dira. Iazko martxotik orain artekoan, azaroa izan da kutsatu gehien zenbatu dituzten hilabetea, zehazki, 275.
Beterri-Buruntza eskualdean 46 positibo detektatu dituzte asteazkenean: hemeretzi Lasarte-Orian, 11 Andoainen, hamar Hernanin, bost Urnietan eta bat Astigarragan. Usurbilen ez dute kasu berririk detektatu azken orduetan. Lasarte-Oria eremu horitik laranjara igaro da; gainontzekoetan ez dago aldaketarik azken egunekin alderatuta.
EAEko hiru lurraldeetan 1.217 kutsatze baieztatu dituzte; horietatik 502, Gipuzkoan. 11.449 PCR eta antigenoen proba egin dituzte; positibotasun-tasa %10,6 izan da. Autonomia erkidegoko intzidentzia-tasa eremu gorrian dago honezkero; 415,55 da.
Osakidetzako ospitaleetan 126 pertsona daude ingresatuta koronabirusagatik, horietatik 28 larri, ZIU unitateetan. Asteazkenean 31 gaixo erietxeratu behar izan dituzte.
