COVID-19

Hiru kasu detektatu dituzte Lasarte-Orian azken orduetan

Txintxarri Aldizkaria 2021ko uzt. 13a, 12:36

Eusko Jaurlaritzako Osasun Sailak eta Osakidetzak uztailaren 12ko datuak jaso dituzte, eta txostena argitaratu dute. Lasarte-Orian hiru kasu atzeman dituzte astelehenean, bezperan baino hiru gutxiago. Edonola ere, igo egin da intzidentzia-tasa metatua (278,29 da orain), eta eremu laranjatik gero eta gertuago dago. Azken hamalau egunetan 53 positibo erregistratu dira gure herrian.

Osasun agintariak datuak herriz herri xehatuta ematen hasi zirenetik, koronabirusak kutsatutako 1.795 lasarteoriatar atzeman dituzte, ehun biztanletik bederatzi pasatxo (%9,4). Ia denak sendatu badira ere, zoritxarrez, 23k ezin izan dute osatu eta hil egin dira. Iazko martxotik orain artekoan, azaroa izan da kutsatu gehien zenbatu dituzten hilabetea, zehazki, 275.

Eskualdeko sei herrietan 27 kutsatze detektatu dituzte astelehenean: bederatzi Hernanin, sei Andoainen, lau Astigarragan, hiruna Lasarte-Orian eta Urnietan eta bi Usurbilen. Udalerri horietako hiru eremu horian daude, eta gorrian beste hiruak.

EAEko hiru lurraldeetan 788 kutsatze atzeman dituzte uztailaren 12an; horietatik 251, Gipuzkoan. 9.498 PCR eta antigenoen proba egin dira kasu berriak atzemateko; positibotasun-tasa %8,3 izan da. Autonomia erkidegoko intzidentzia-tasak igotzen jarraitzen du; 346,68 da.

Osakidetzako ospitaleetan 110 pertsona daude ingresatuta koronabirusagatik; horietatik 23k sintoma larriagoak dituzte, eta ZIU unitateetan daude. Astelehenean 26 gaixo erietxeratu dituzte.

Erlazionatuak