2020ko martxo erdialdean hasi ziren erakunde horiek datu epidemiologikoen berri ematean. Ordutik gaur egunera arte, 1.656 lasarteoriatar kutsatu ditu COVID-19ak, ehun biztanletik ia bederatzi (%8,7). Gaixotasuna pairatu duten pertsonetatik 22k ezin izan dute gaitza gainditu, eta zendu egin dira. Intzidentzia gehieneko hilabetea iazko azaroa izan da; 275 kutsatze erregistratu zituzten.
Zortzi positibo eskualdean
Hernanin hiru kasu, Lasarte-Orian bi, eta bana Andoainen, Urnietan eta Usurbilen; Astigarragan, aldiz, bakar bat ere ez. Hori izan da maiatzaren 24ko balantzea Beterri-Buruntza eskualdeko udalerrietan. Eremu horian daude seiak, 60 eta 299ra arteko intzidentzia-tasa metatuekin.
EAEko hiru lurralde historikoetan 276 kutsatze atzeman dituzte astelehenean; horietatik 91, Gipuzkoan. 8.729 PCR eta antigenoen proba egin dira egun horretan; positibotasun-tasa %3,2 izan da. Koronabirusagatik 212 pertsona daude ospitaleratuta Osakidetzako zentroetan; sintoma larriak dituzte 117k, eta ZIU unitateetan daude. Maiatzaren 24an 40 gaixo erietxeratu behar izan dituzte.
