Udalaren aburuz, herritar batzuk "erlaxatzen" ari dira, eta ez dituzte osasun-neurriak betetzen. "Oso arriskutsua da horrela jokatzea; kutsatzeen laugarren olatu batera eraman gaitzake neurriak ez errespetatzeak".
Kaleak eta plazak, adibide
Oharrean zenbait adibide zerrendatu ditu udalak. Esate baterako, kaleak eta plazak: "Udaltzaingoak eta Ertzaintzak jakinarazten digutenez, herritar guztiak ez dira indarrean dagoen araudia betetzen ari. Negua badoa, eta eguraldi hobea egin ahala, lau pertsonakoak baino gehiagokoak diren multzo gero eta gehiago ikusten dira, arratsaldeetan eta asteburuetan batez ere". Horrekin batera, herritarrek botila-festak egiten jarraitzen dutela esan du udalak, edo kalean edaten. Gogoratu du "debekatuta" dagoela hori.
Ostalaritzaren gainean ere hitz egin du udalak oharrean. "Sektore horretan lan egiten duten tabernari askok ahalegin handia egiten dute egoerara egokitzeko, baina ez guztiek. Utzikeriagatik edo nahita egiten dutelako, zenbait ez dira neurriak errespetatzen ari: baimendutakoak baino mahai gehiago jartzen dituzte, lau pertsona baino gehiago elkartzen dira, maskarak ez dira behar bezala erabiltzen...". Agustin Valdivia alkatea berriki elkartu da Ostalaritza Lasarte-Oria elkartearekin, "kezka eta ezinegona" adierazteko.
