Gipuzkoako ostalarien auto karabana eta kontzentrazioa asteburuan: "Ez da azkena izango"

Iñigo Gonzalez Sarobe 2021ko urt. 18a, 11:08

Gipuzkoako ostalariek bizitzen ari diren "egoera prekarioa" salatzen jarraitzen dute, mobilizazioak eginez. Tolosatik Andoainera, auto karabana egin dute larunbatean N-1 errepidean barrena, eta kontzentrazioa gero, Beterri-Buruntza eskualdeko herri horretan. Lasarte-Oriako zenbait tabernarik parte hartu dute ekimenean.

N-1 errepidean barrena protesta egin ostean, Gipuzkoako ostalariek antolatutako ekimenean parte hartu zuten pertsonak Andoainera joan ziren, kontzentrazioan parte hartzera. Deitzaileek manifestu bat irakurri zuten euskaraz zein gaztelaniaz. Honela dio:

"Eguerdion denoi,

Lehenik eta behin, eskerrak eman nahi dizkizuegu Kotxe Karabana honetan parte hartu duzuen guztioi: Tolosa-Billabona-Andoain, eta kontzentrazio honetara etorri zareten guztioi. Ez da azkena izango, denak adierazten baitu aurtengo urtea 2020a bezain txarra izango dela eta mobilizatzen jarraitu beharko dugula.

Mingarria da entzutea nola esaten duten gure agintariek harrituta geratzen direla Gabonak igaro ondoren positiboen hazkundearekin, tontoenak ere lehendik zekienean, iragarritakoa baino gehiago zela. Gutako askok nahiago genuen lokalak itxita mantentzea, Euskadi eta Espainiako gobernuek benetako borondatea izan balute pandemia behin
betirako amaitzeko. Ostalaritza negozioak ireki ziren, gorrian ez zeuden herrietan, limosna bat ematearen gastua ekiditeko.

Bigarren itxialdiaren ondoren, irekitzera behartu gintuzten, oraindik baldintza okerragoetan, atzera pauso osoa emanez. Arratsaldeko 8etan edo 6etan itxi behar genuen, gehien fakturatzen genuen Gabonetako
egunetan.

Sektoreak merezi duen irtenbidea lortzeko, jakin beharko genuke ea Gipuzkoako Foru Aldundiak planen bat garatzen duen hala ez duen (zuzeneko laguntzak, zerga abantailak, Covid-en positiboek eragindako
itxierak,…).

Adostu etorkizunerako itxiera neurriak, komunikazioak nahiko denborarekin izatea adibidez. Zergatik ematen dira laguntzak hain berandu itxierarekin konparatuta? Alokairuetan eta banku maileguetan bitartekaritza egitea beharrezkoa da…Eta laguntzak baino gehiago, konpentsazioak. Negozio itxiek galera handiak besterik ez dizkigute sortu.

Borrokan jarraitu behar dugu! Gure borrokarekin eta gure mobilizazioekin bat egitera animatzen zaituztegu. Ezin gara geldirik egon murrizketa eta itxiera berrien zain. Gobernuekin egindako negoziazioetan baliozko agentea izatea lortu behar dugu. Ez gaitu ostalari handiak ordezkatzen, Ostalaritza Aurrera langile soilak diren ostalari taldea da, ez korbatarekin gabiltzanak. Eta denok bat eginda joan behar dugu.

Ostalaritza, aurrera!! Ostalaritza, aurrera!! Ostalaritza aurrera!!"

Erlazionatuak

Ostalarien aldarriak, errepidean berriro

Txintxarri Aldizkaria 2021 urt 12 Ekonomia