Ohiturari jarraituta, urnietarrek Santikurutz eguna ospatuko dute Azkorteko ermitan: 11:30ean, meza. 12:30ean, Angel Larrañaga eta Aratz Igartzabal bertsolariak. Ondoren, erromeria, Komerik taldearen eskutik. 10:00etatik 14:00etara Azkortera igo eta jaisteko autobus zerbitzua emango du Urnietako Udalak, udalerri horretako Pintore kaletik abiatuta.
Urteroko usadioari eutsiko diote Ttakun Kultur Elkarteak eta Lasarte-Oriako Udalak. 10:30etik bazkalordura arteko erromeria aurrera eramango dute Buruntza mendiaren magaletan dagoen Azkorteko ermitan: meza, trikitilariak, herri kirolen erakustaldia eta goxo jan eta edateko taberna. Hauxe izango da iganderako egitaraua: 11:00etan, meza, Alboka Abesbatzak girotuta. 11:45ean, Lierni Arozena eta Olaia Recondo trikitilariak. 12:15ean, herri kirolen erakustaldia: Ugaitz eta Aratz Mugertza aizkolariak eta Beñat Telleria harrijasotzailea. 13:15ean, trikitilariak. Taberna 10:30ean irekiko dute eta bazkalorduan itxiko dute. Bertaratzen direnek aukeran izango dituzte, edari freskoez gain, txorizo, odolki edota haragi egosi pintxoak.
Herri omenaldi erraldoi bat egingo diete Pirritx, Porrotx eta Marimotots pailazoei, Barakaldoko (Bizkaia) BEC aretoan. Ekitaldira bertaratzeko autobusa antolatu dute Ttakun Kultur Elkarteak eta Zabaleta Auzolan elkarteak. Bi geldialdi egingo ditu, 14:00etan Tajamarren eta 14:15ean Zabaletako Antonio Blas plazan.
