Hiru multzotan banatuta, hainbat gako plazaratu ditu Ebete Hizkuntza Zerbitzuakeko Iñaki Eizmendi Arsuagak, familietan euskararen transmisioa eman dadin laguntzeko eta errazteko.
GOZATU EUSKARA EMATEN
Zuen seme-alabek euskara aberatsa izatea, familion ardura ere bada.
Zer da euskara aberatsa izatea? Edozein egoera eta harremanetan euskaraz (ere) eroso aritzeko gai izatera iristea: lagunartean, ikasketetan, helduekin harremanean, kirolean, aisialdian...
► Eskaini euskara etxetik: euskalduna bazara, jolastu hizkuntzarekin (hitz egin, abestu, ipuinak irakurri... zenbat eta gehiago, hobe!). Euskaraz ondo ez badakizu edo gutxi gutxi baldin badakizu, zaindu zuen hizkuntza eta eskaini euskara eguneroko esamoldeen, abestien eta jolasen bidez.
► Zaindu etxean euskarak duen lekua: euskara entzun eta bizitzeko aukera izan dezatela. Giroan egon dadila euskarazko edukien bidez: musika, ipuinak, aldizkariak... Eta zuek ere egin euskarari lekua etxean: irratia, prentsa, telebista...
► Eskaini ahal duzuen euskara guztia ingurune hurbilean. Bereziki, eskolaz kanpoko jardueretan: euskarazkoak hautatu, eta euskararen presentzia eta erabilera zaindu ditzatela eskatu. Erabiliz garatzen da gaitasuna.
HELDU ERABILERAREN ERRONKARI
Lagundu diezaiegun lagunartean eta beste hainbat harremanetan euskara erabiltzeko benetako aukerak izaten.
Zer da erabileraren erronka? Euskara erabiltzea ez da aukera soil bat, ibilbide baten ondorioa izaten da. Lagundu txikiak direnetik ibilbide indartsua izaten.
► Eredu indartsuak eskaini: euskaldunon kasuan, ikus dezatela euskarak balio dizuela eguneroko bizitzan. Benetako Ahobizi edo Belarriprest bazarete, eredu bikaina eskainiko diezue seme-alabei.
► Bizipenak eta erreferenteak eskaini: euskaraz diren bizipenak eta erreferenteak behar dituzte euskara balio indartsuekin lotzeko. Eskolaz kanpoko jarduerak oso lagungarriak dira.
► Euskaraz bizi diren talde eta giroetan parte hartu edo harremanetan jarri: euskarazko ekitaldietara joan (zinema edo antzerkia, adibidez) eta euskararen aldeko ekitaldietan parte hartu (Korrika, Euskararen eguna edota Euskaraldia).
ESKOLAK BADU ARDURA, BAINA MUGAK ERE BAI
► Lagundu eskolari hizkuntzak irakasteko bidean: etxetik eta ingurune hurbiletik euskara asko eskaintzea familion ardura da, eta eskolak mugak ditu euskara aberatsa eskaintzera begira.
► Euskararen erabilerarekiko interesa erakutsi: galdetu irakasleekin egiten duzuen bileretan euskararen erabilerari buruz, eta kontuan izan beraien aholkuak