'Tragaluz' lan berria aurkeztuko du bihar Olga Serrano idazle herritarrak

Txintxarri Aldizkaria 2026ko martxoaren 12a

Bere aurreneko eleberria, 'Juguetes de niño sádico', Semblante Andaluz elkartearen 2023ko Aste Kulturalean aurkeztu zuen herritarrak. Argitaratu duen bigarren lana da 'Tragaluz'.

Olga Serrano idazle lasarteoriatarrak bigarren lana argitaratu du, 'Tragaluz', Xordica argitaletxearekin. Eleberri gotikoaren ukituak dituen tentsioz betetako bidaia psikologikoan murgilduko ditu irakurleak Hana eta Unai protagonista dituen kontakizunaren bidez. Bihar aurkeztuko du liburua, Manuel Lekuona Kultur Etxean, 19:30ean.

Hana eta Unai bikote dira eta herri lasai batera joko dute oporretan, hurbileko heriotza baten dolua gainditzeko asmoz. Hala ere, itxurazko barealdi hori Hanaren barne hausturaren hasiera besterik ez da izango. Istorioak aurrera egin ahala, Hanak antsietate-egoera larria pairatuko du, non eguneroko objektu soilak mehatxu bihurtzen diren eta errealitatearen mugak lausotu egiten diren.

Eleberriak giza psikearen "alderdi ilunenak" arakatzen ditu: obsesioa, errua eta arrazoiaren zein instintuaren arteko betiko talka. Unairen pertsonaiak arrazionaltasun hotza ordezkatzen duen bitartean, Hanaren mundua munstro bihurtuko da, irakurleari honako galdera hau zuzenean eginda: Hanaren barne desioa ote da ala bada toki ilun batetik deika ari zaion ahots ezezagunen bat?.

Xordica argitaletxearekin argitaratutako lan hori salgai jarri du jada egileak. 160 orri ditu eta ale bakoitzak 15,95 euro balio ditu. Aurreneko eleberria, Juguetes de niño sádico, 2022an kaleratu zuen eta hurrengo urtean aurkeztu zuen Semblante Andaluz elkartearen XX. Aste Kulturalaren barruan.

Kultura