Eduki hau partekatzeko esteka arbelera kopiatu da.
GurasoLeku programaren adarretako bat da GurasoLandia, 0 eta 5 urte bitarteko haurrak dituzten familiei zuzendua. Horien arteko loturak indartzeko eta euskara transmititzeko hartu duten konpromisoa aberasteko, hilabetean behin TrukeLandia ekimenan parte hartuko dute. Izenak aurreratzen du saio horietan egingo dutena: jolasak, ipuinak, abestiak, bizipenak... trukatu, nola ez, euskaraz. Hizkuntza hori modu naturalean eta egunerokoan presente egongo den harreman guneak sortuko dituzte, beraz. Edozein zalantza dutenek (betiere GurasoLandian parte hartzen ari badira) Lasarte-Oriako Udaleko Euskara Sailera jo, ttakun@ttakun.eus helbide elektronikora idatzi edo 943-36 68 58 telefono zenbakira dei dezakete.
Egitasmoa Udaleko Euskara Zerbitzuak bultzatzen du, Ttakun Kultur Elkartearekin, Andre Joakina Haur Eskolarekin, Landaberri eta Sasoeta-Zumaburu ikastetxeekin, Burunzpe eta Landaberri guraso elkarteekin eta Muntteri euskaltegiarekin elkarlanean.
Atzo arratsaldean egin zuten aurkezpen ekitaldia eta gonbidatu bereziak nahiz sorpresak ez ziren falta izan: egindakoa koloreztatu zuen Porrotx pailazoak eta eskusoinuarekin trebe aritu zen Hugo Amil gaztea, Ttakunenea elkartea girotzen. Ttakun Kultur Elkarteko kudeatzaile Haritz Salaberriak izen ematearen eta egitasmoaren nondik norakoak azaldu zizkien bertaratutakoei, parte hartzera animatzearekin batera.
