500 euroko bonu bana etxeratu dute Karmele Urkolak (bihar bere urtebetetzea dela kontatu du, gainera) eta Julia Navasek. Mario Vidal eta Carlos Garciak, berriz, 250 euroko erosketa txartel bana poltsikoratu dute. Lauek pozarren jaso dituzte zozketan irabazitako sariak eta hilaren 30a baino lehen erabiliko dituzte. Talde argazkia atera ostean, Aterpearen zuzendaritzako kide Ana Laureanok txartel horiek erabiltzeko jarraibideak eman dizkie saridunei.
Aterpeako kideek nahiz udal ordezkariek goraipatu egin dituzte Udazkeneko Festa bezalako egitasmoak eta aurreratu dute ekimen gehiago ari direla prestatzen, gero eta hurbilago dauden Eguberriei begira. Merkatarientzat garai "garrantzitsua" izan ohi dela nabarmendu dute.
