[AURRERAPEN ALBISTEA] Buruntzaldean errotuta dagoen eta dagoeneko fruitu oparoak eman dituen lankidetza hitzarmena berritu dute eskualdeko sei udalerrietako ordezkariek. Hernaniko udaletxeko pleno aretora bertaratu dira Astigarragako alkate Xabier Urdangarin, Hernaniko alkate Xabier Lertxundi, Usurbilgo alkate Agurtzane Solabarrieta, Lasarte-Oriako alkate Agustin Valdivia, Andoaingo Udaleko Euskara zinegotzi Marta Lasa eta Urnietako Udaleko Sustapen zinegotzi Ana Pozas. Gauzak horrela, euskara arloan lankidetzan segiko dute, orain arte landutako guztiaz gain erronka berriei helduta, hori bai, orain arteko helburuari eutsita: euskararen normalizaziorako egitasmoak elkarren artean bideratzea.
Lau urterako izango den elkarlan egitasmoa 2002an hasitako lanaren segida izango dela nabarmendu dute ordezkariek. Alkateak ez ezik, Euskara zinegotziak (Estitxu Alkorta lasarteoriatarra barne) eta teknikariak (herriko Euskara zerbitzuburu Ana Labaka tarteko) ere bertaratu dira.
Eskualdeko lau hedabideok, Aiurri, Kronika, Noaua eta TXINTXARRI-k, datorren astean argitaratuko dugu ekimen honi buruzko erreportaje sakona.