Datozen egunetan ekimenaren berri ematen eta sinadurak biltzen jarraituko dute. Bihar, arratsaldeko seietan, aurkezpen bilera bat egingo dute Biyak Bat adinekoen egoitzan, eta, etzi, mahai bana jarriko dute Okendo plazan, Ola kalean eta Elizatzen, 10:00etatik 14:00etara.
Pentsiodunek hilero kobratzen dituzten ordainsariak Lanbide arteko Gutxieneko Soldatarekin parekatzea eskatzen ari da, besteak beste, Euskal Herriko Pentsiodunen Mugimendua. Herri Ekimen Legegile bat egin du gaiari ikusgarritasuna eman eta politikarien agendan sartzeko. Orain, herriz herri atxikimenduak biltzen ari da, tokian-tokian eratu dituzten talde eragileen laguntzarekin. Lasarte-Orian ere jarri dira martxan eta aste gutxitan 900 atxikimendu inguru jaso dituzte; azkenak, atzo, Andatza plazako azokan.
