Lasarte-Oriako Elkartasun Sareak konpromisoa hartu du, hilean behin, Donostian kale egoeran dauden pertsonentzat afariak prestatu eta banatzeko. Datorren asteko asteartean burutuko dute hurrengo txanda, eta, horren aurretik, elikagaiak eta negurako jantziak jasoko dituzte larunbat honetan Okendo plazan, 11:00etatik 13:00etara. Horrez gain, dirua ere onartuko dute baten batek eman nahi izanez gero, aipatu egitasmo horren logistika gastuak ordaintzen laguntzeko.
Afari solidarioak prestatu ahal izateko olioa, dilistak, arroza, esnea eta txokolatezko hautsa behar dituzte. Bestalde, hotzetik babesteko mantak, lo zakuak, bufandak eta eskularruak ere bilduko dituzte.
Kaleko Afari Solidarioak egitasmoko kideekin lankidetzan ari dira elkartasun sareko lagunak eta afari solidarioak emateko aurreneko txanda urtarrilaren 28an egin zuten. Bertatik bertara jarraitu zuen TXINTXARRI aldizkariak.
2025 urt 29 Gizartea