Herri Ekimen Legegile baten bidez, Euskal Herriko Pentsiodunen Mugimenduak eskatu du hileroko pentsioak Lanbide arteko Gutxieneko Soldatarekin (1.184 euro) parekatzea. Gai hori Eusko Legebiltzarrera eramate aldera, atxikimenduak jasotzen ari dira herriz herri, baita Lasarte-Orian ere. Hori dinamizatzen ari den herritar taldeak jakinarazi du Andatza plazako azokan izango direla boluntarioak bihar, 09:30etik aurrera. Sinatu nahi dutenek 18 urte edo gehiago izan behar dituzte eta euren nortasun agiria erakutsi.
Atxikimenduak biltzeko bi saio aurrera eraman dituzte orain arte eta 744 sinadura jaso dituzte dagoeneko. "Etengabe hurbildu zaizkigu herritarrak informazio eske, eta, Herri Ekimen Legegilearen berri izan da, prest agertu dira sinatzeko", jakinarazi dute herriko pentsiodunen taldeko kideek.
Pentsioak LGSarekin parekatzeaz gain, ekimen horren bidez nahi dute gutxieneko pentsioak osatzeko euskal sistema bat garatu, 60 urtetik gorako pentsiodunen gizarte bazterketa egoera saihesteko.
