Aurkezpen ekitaldian egileek azpimarratu zuten "maitasun handiz" ondu dutela Murmur. Testua eta irudiaren arteko elkarrizketa osatu dute eta karaktere kopuruari begira "nahiko laburra" izan arren, sakontasuna baduela, hitzei eta ilustrazioei "geruza ugari" jarri baitizkiete biek ala biek. "Marmarra, murmurioa, xuxurla" esan nahi du izenburuak eta narrazioan zehar uraren soinuari erreferentzia egiten dio. Horri lotuta, herritarrak "lur azpiko erreka batekin" parekatu zuen bere sortzeko modua.
Aipatu lan hori XVIII. Peru Abarka lehiaketara aurkeztu zuen Labakak eta narrazio onenaren saria irabazi zuen. Ilustratzaile irabazlea, berriz, Samitier izan zen. Markina-Xemeingo Udalean jaso zuten biek saria urriaren 24an. Antolatzaileek jakinarazi dute hamasei lan aurkeztu zituztela sariketa horretara eta Murmur izan zela irabazlea, epaimahaikideek (Leire Bilbao, Ainhoa Aldazabal eta Mari Eli Ituarte) aho batez aukeratuta.
