Ekimen horretarako motorrak berotze aldera, taloak egiten ikasteko bi saio antolatu ditu euskara elkarteak, hilaren 19an. Lehenengoa 17:00etatik 18:30era izango da (honezkero toki guztiak hartuta daude) eta bigarrena 18:30etik 20:00etara. Izena eman nahi dutenek kultura@ttakun.eus helbide elektronikora idatzi edo 695 78 53 89 telefono zenbakira deitu behar dute ahal bezain lasterren.
Olentzero eta Mari Domingi
San Tomasetik hiru egunetara etorriko dira herrira Olentzero, Mari Domingi eta lagunak. 12:00etan desfilatuko dute herriko kaleetan barrena eta 12:30ean ikuskizun koloretsu bat emango dute Porrotx pailazoarekin batera, Okendo plazan. Horren aurretik, herriko ikastetxeetako haurrak kantu eskean ibiliko dira erdigunean barrena, 11:00etan hasita. Desfilearen eta emanaldiaren ostean, haurren eskutitzak jasoko dituzte Okendon bertan eta Antonio Mercero gunean, 13:00etatik 15:00etara.
Ekitaldi horretara joan nahi dutenek txartelak eskuratu behar dituzte Ttakun KEren bulegoan (Geltoki kalea 4, behea), hilaren 19an eta 20an, 09:00etatik 13:00etara edota 16:00etatik 18:00etara.
Bestalde, Xixuko ahatea ariko da lanean Olentzero eta Mari Domingi etorri aurreko egunetan, izan ere, Garaikoetxea-Landaberriko haurren marrazkiak jasoko ditu 18an eta Sasoetakoenak 20an.
