Egun berezia izan ohi da Santa Ana eguna herritarrentzat. 11:00etarako fededunez bete da Ama Brigitarren komentua; zaindariaren omenezko elizkizunean parte hartu dute. Felix Garitanok eskaini die meza bertan bildutako sinestunei. Horietako zenbait zapi gorria lepoan jantzita bertaratu dira. Bertako mojak ere arduratu dira elizkizuna girotzeaz, eta Erketz EDTko kideek agurra dantzatu dute. Jarduera hori amaitu eta komentuaren kanpoan hamaiketako eder bat izan dute herritarrek; egunari eusteko goxo bete dituzte sabelak bertan bildutakoek.
Eguerdian, berriz, Erketz EDTko dantzariak agurra dantzatu dute Santa Ana karkaba parean; hainbat udal ordezkari eta herritar ugari izan dituzte ikusle.
Desfilea eta parodia
Ospakizunak arratsaldean izango du jarraipena. 18:30ean hasiko da iluntzeko parodian parte hartuko duten antzezleen desfilea; Jalgi Kafe Antzoki paretik abiatuko da ekimen hori. 20:00etan hasiko da eguneko ekitaldi nagusia, Santa Eguneko parodia. Urte zehar herrian gertatu direnak umoretik oholtzaratuko dituzte aktoreek epaiketa modura eta akusatuak sutan erreko dituzten ala ez erabakiko dute.
Pala txapelketako finalak
Udalak antolatutako Santa Ana Pala Txapelketako azken partidak ere gaur jokatuko dira. 17:30ean hasiko dira, Loidibarren pilotalekuan. Hirugarren eta laugarren postua jokatuko dituzte, eta hori amaitu ondoren izango da finala.
