Udalerriari "egonkortasun handiagoa" ematea izan da koalizio gobernu bat eratzearen arrazoia, sozialistek eta jeltzaleek azaldu dutenez. "183 neurriko gobernu programa bat aurrera eramateko konpromisoa hartu dugu, egiteke dauden inbertsio handiak bermatzeko eta egungo zerbitzuei nahiz behar berriei erantzuteko". Gehitu dute Lasarte-Oriaren historian "lehenengo aldia" izango dela gobernantza bi alderdiren artean era horretan banatuko dutena.
Udal gobernuak hamar zinegotziren babesa (orotara hamazazpik osatuko dute korporazioa, EH Bilduren bost eta ELOPen nahiz PPren bana gehituta) izango duenez, "gehiengo nahikoa" izango dute PSE-EEk eta EAJk aurrekontuak eta ordenantza fiskalak aurrera ateratzeko, besteak beste. "Lasarte-Oria solidario, elebidun, feminista, jasangarri eta bizi baten aldeko programa bat garatuko dugu".
Karguak eta batzordeen banaketa
Gauzak horrela, Agustin Valdivia sozialistak jarraituko du alkate izaten; lehen alkateordea alderdi bereko Nuria Fernandez izango da, eta bigarrena, Jon Antxordoki jeltzalea. Bestalde, Tokiko Gobernu Batzordea alkateak berak, PSE-EEko beste hiru kidek eta EAJko beste bik eratuko dute.
Batzordeak honela banatzea adostu dute:
- Antolaketa, Herritarren Parte Hartzea eta Barne Araubidea: Nagore Duran (PSE-EE).
- Ogasuna eta Ondarea: Iñigo Zabaleta (PSE-EE).
- Hirigintza, Obrak eta Ingurumena: Agustin Valdivia (PSE-EE).
- Zerbitzu publikoak: David Mateos (PSE-EE).
- Gizarte Zerbitzuak, Berdintasuna, Lankidetza eta Osasuna: Lourdes Acevedo (PSE-EE).
- Hezkuntza eta Gazteria: Nuria Fernandez (PSE-EE).
- Sozioekonomia: Nuria Fernandez (PSE-EE).
- Jaiak: Txus Alonso (PSE-EE).
- Euskara: Jon Antxordoki (EAJ).
- Kultura: Anne Ugarteburu (EAJ).
- Kirolak: Goizalde Pildain (EAJ).
