Lehen zenbakia argitaratu dute, azkena izateko esperantzarekin. "Azkena izateko bokazioz jaioa" da Azkenak! fanzinea, Lasarte-Oriako Presoen Aldeko Batzordeko lagunek herriko zenbait sortzailerekin elkarlanean ondu duten argitalpena. Aurten aurrera eraman dituzten Azken Ostiraleko lanketak bildu, eta artistei eskatu diete irudiz janzteko. Ione Zabala, Sara Etxeberria, Idoia Telleria, Isa Fernandez de Agirre eta Aitzol Iriondok egin dute hori. Testua eta ilustrazioak nahiz argazkiak Uxune Iparragirrek maketatu ditu. Egitasmo kolektibo horren emaitza, hogei orriko aldizkaria, Agora tabernan eskuratu dute aurkezpenera bertaratu diren herritarrek, borondatearen truke.
Aurkibidearekin eta hitzaurre batekin hasten da Azkenak!. Hurrengo orrietan, hilabete bakoitzeko Azken Ostiralean landutakoa: urtarrilean, tortura; otsailean, dispertsioa; martxoan, emakumea eta kartzela; apirilean, internazionalismoa; maiatzan, langile borroka; ekainean, transfeminismoa; eta irailean, memoria. Hitzezko lanketa, ezkerrean, eta hura janzten duen irudia zein argazkia, eskuinean. Orrialde zentraletan beste ataltxo bat gehitu dute, euskal presoen sakabanaketari buruzkoa. Aipamen berezia egin diete espetxeratuta jarraitzen duten hiru herritarrei: Aitzol Iriondo, Ibon Fernandez eta Jabi Gallaga. Hiruen egoera azaldu, eta euren kartzeletako helbideak jakinarazi dituzte.
"Oso pozik" daudela azpimarratu dute presoen aldeko batzordeko kideek: "Espero baino jende gehiagok parte hartu du Azkenak! egiteko prozesuan: ilustratzaile, argazkilari, idazle, maketatzaile... Esker hitzak besterik ez ditugu". Fanzinean jaso dituzten ilustrazioekin erakusketatxo bat ireki dute Agora tabernan bertan, hilaren 16ra arte.
Enkante kolektiboa eta kontzertua
Fanzine bat argitaratzearena izan da batzordeak abendurako prestatu duen jarduera nagusietako bat, baina ez bakarra. Gaurko aurkezpena baliatu dute honakoa iragartzeko: aldizkariko ilustrazio eta beste zenbait produkturekin enkante kolektibo bat egingo dutela Tiburtzio Artizar tabernan, hilaren 16an, ostiralez, Tiburtzio Artizar tabernan, 19:00etatik aurrera. Aurreratu dute Iñaki Esparza presoak Lannemezango kartzelan (Frantzia) egindako gitarra bat jarriko dutela, besteak beste. "Enkanteari bultzada bat emango diolakoan, eskaintzak taldean egiteko eskatuko diegu partaideei: familian, kuadrillan...". Aurkezleak ez dira batzordeko kideak beraiek izango, Bea Egizabal eta Intza Alkain. "Gu baino martxa gehiago emango diote arratsaldeari", bota dute, umorez.
Ordu eta erdi ingurukoa izango da enkantea. Horren ostean, eguna biribiltzeko, kontzertua emango du Eñaut Zubizarreta Trigger musikariak, 21:00ak aldera.
Aipatu jardueraren berri gehiago izan nahi dituenak, jarrai ditzala Lasarte-Oriako Presoen Aldeko Batzordearen Twitter kontua nahiz Telegram kanala.
