Zure abizena Echeverria bada eta Etxeberria-ra aldatu nahi izanez gero, "oso erraz" egin dezakezu Buruntzaldeko udaletako bake epaitegietan. Berriki abiatu dute aurtengo kanpaina, eta azaldu dutenez, agiri gutxi batzuk baino ez dira behar. Antxordokik azaldu du hauek direla lasarteoriatarrek bertara eraman behar dituzten agiriak:
- Errolda agiria, udaletxeko bulegoetan egiten dena.
- Jaiotzagiri literala. Herriko bake epaitegian egiten dute. Donostian erregistratuta egonez gero, hiri horretara joan behar dute, Kalkutako Teresa plazara.
- NAN agiriaren kopia bat.
- Ezkonduta egon edo seme-alabaren bat izanez gero, familia liburua.
Herritar batek bere abizenaren euskarazko baliokidea zein den jakiteko, Euskaltzaindiaren Onomastika atala kontsultatu behar du.
2000. urtetik martxan
Erregistro zibilaren legearen 40/1999 erreformak ahalbidetu zuen deiturak zuzenean euskalduntzea, ordura arte abizenak aldatzeko prozeduraren bitartez egiten baitzen hori. Orduz geroztik, makina bat izan dira apelliduak abizentzera animatu diren pertsonak.
Esan bezala, eskualdeko herri guztietako kanpaina martxan dago aurten ere; 2009-2010 ikasturtean euskarazko egitasmoak elkarrekin burutzeko plan bat adostu zuen eskualdeko udal guztiek: horretan jaso zuten Apelliduak abizendu.
Zalantzarik izanez gero, euskara@lasarte-oria.eus helbidera idatzi edo 943 37 61 84 telefonora dei daiteke.
