Argazkiak helbide elektronikoz eta WhatsApp aplikazioaren bidez bidali eta jasotzera ohituta gauden honetan, poza ematen dute Etxeberriarenak bezalako eskaerek: kazetariari galdetu dio ea posible den irudia inprimatu eta eskura ematea, gero etxean gorde ahal izateko, album edo koadroren batean, akaso. Ez da gutxiagorako, izan ere, 1.500 euroko sariak ez dira egunero irabazten. "Aspalditik naiz Ogi Berriko bezero, eta urtero parte hartzen dut Eguberrietako sarian", zehaztu du. "Zenbaitetan oso-oso gertu geratu naiz saria irabaztetik, zenbaki gutxitara, eta aurten irabazi egin dut. Bazen garaia!".
Egun batzuk pasa dira sorpresa atsegin hori hartu zuela: "Etxean nengoen, eta senarrari galdetu nion ea zein izan zen aurtengo zozketaren zenbakia. Egiaztatu zuenean, hori bai hori ezustekoa! Poz galanta hartu genuen biok", gogoratu du. Ez da denbora asko pasa, baina Etxeberriak badaki diruaren zati bat behintzat zertan gastatuko duen: bidaia bat egingo du senarrarekin, biak erretiratuta daudela aprobetxatuta, Aste Santua baino zertxobait lehenago, "jende asko" pilatzen baita orduan toki guztietan. "Garai zailak bizi ditugu etxean pandemiarengatik, eta disfrutatzea merezi dugula uste dut".