13:00ak puntu-puntuan. Herriko osasun zentroaren atarian, langile batzuk eta sindikatuetako zein Lasarte-Oriako EH Bilduko ordezkariak eta zenbait herritar, gaurko deitutako elkarretaratzean parte hartzen. Ondoan, kiroldegiraino iristen zen ilara: dozenaka herritar, PCR proba noiz egiteko zain. Euskal Autonomia Erkidegoko osasun zentro askotan manifestatu dira, eta deiekin bat egin du EH Bildu alderdiak. Haren aburuz, "kolapso egoeran" dago Osakidetzako lehen arretaren zerbitzua. "Ez da kasualitatea: pandemiaren kudeaketa okerraren ondorioa da, eta osasun publikoa indartzera bideratuta ez dauden politika publikoen emaitza".
Koalizio subiranistaren irudiko, erkidegoko anbulategiak eta bertako langileak "erabat gainezka" daude, eta ez dira pazienteak "behar bezala artatzeko gai". "Alor horretako profesionalek urteak daramatzate egoera salatzen, eta herritarrek hori pairatzen, baina muga guztiak gainditu dira pandemiarekin: gaur-gaurkoz osasun zentroetan ikusten diren egoerak imajinaezinak ziren duela urte batzuk".
Lasarte-Oriako elkarretaratzean parte hartu dutenek kalitatezko osasun publikoaren aldeko deia egin dute, eta agintariei eskatu diete Osakidetzako lehen arretaren zerbitzua indartzeko.
